سفر آخرت
وفات کے دن حضرت نورالعین، شیخ نجم الدین اصفہانی، شیخ محمد درّیتیم، شیخ ابوالمکارم، شیخ احمد ابوالوفاء خوارزمی، شیخ عبدالسلام ہروی، شیخ ابوالو اصل،شیخ معروف الدیموی،شیخ عبدالرحمن خنجدی، شیخ ابوسعید خرزی، ملک محمود، شیخ شمس الدین اودھی اور دوسرے اکابرکو آپ نے اپنے پاس بلاکر بٹھایا اور ان کو نصیحتیں کیں اور تبرکات کی گٹھری منگائی، اس میں چارخرقے تھے جو چار بزرگوں سے ملے تھے۔ ایک آپ کے پیرومرشد شیخ علاء الحق پنڈوی رحمتہ اللہ علیہ سے ملا تھا، دوسرا ولایت چشت کے سجادہ نشین سے ملاتھا، تیسرا شام کے شیخ الاسلام سے ملاتھا، چوتھا جلال الدین بخاری مخدوم جہانیاں جہاں گشت سے ملا تھا۔آپ نے چاروں خرقے حضرت نورالعین کو عنایت فرماکر فاتحہ پڑھا اور فرمایا میرے فرزند برحق و خلیفۂ مطلق نورالعین ہیں، اور بزرگان چشت کے وہ تبرکات بھی دیئے جو ان کو ان کے مرشد کے ذریعے دستیاب ہو ئے تھے، پھر حضرت نورالعین کے فرزندوں کو بلایا اور بڑی عنایت و مہربانی فرمائی اورانھیں بھی خرقہ و تبرکات عطافرمائے اور ہر ایک کے بارے میں دعائیہ کلمات ارشاد فرمائے اوران کی خوبیاں بیان فرمائیں، اسی طرح مختلف خلفاء کو بھی نصیحتیں کر کے خاص خاص ہدایتیں دیں اورتبرکات عطا فرمائے۔ یہاں تک کہ نماز ظہرکاوقت ہوگیا۔ حضرت نورالعین کو امامت کا حکم دیا اور خود حضرت نے بھی ان کی اقتداء فرمائی۔ نماز کے بعد آپ بیٹھ گئے اور قوالوں کو طلب فرمایا اور محفل سماع شروع ہوگئی، حضرت نے قوالوں کو شیخ سعدی رحمتہ اللہ علیہ کے چند اشعار پڑھنے کا حکم دیا۔ قوالوں نے جب یہ شعر پڑھا ؎
گر بدست تو آمدہ اجلم
قد رضینا بم جری القلم
(اگر تیرے ہی ہاتھ میں میری موت آنی ہے تو ہم نوشتۂ تقدیر پر راضی ہیں)
تو آپ پروجد وکیف طاری ہوا۔
اور جب قوالوں نے یہ شعرپڑھے ؎
خوب تر زین دیگر چہ باشد کار
یار خنداں رود بجانب یار
سیر بیند جمال جاناں را
جاں سپارد نگار خنداں را
(اس سے بہتر دوسرا کام اور کیا ہوگاکہ ایک عاشق اپنے محبوب کے پاس مسکراتے ہوئے جائے، آزادانہ محبوب کے جلوے کا نظارہ کرے، اور مسکراہٹیں عطا کرنے والے کو اپنی جان سپرد کردے)
تومرغ بسمل کی طرح تڑپنے لگے اوراسی حالت میں اپنی جان جانِ آفریں کے سپرد کردے، فِيْ مَقْعَدِ صِدْ قٍ عِنْدَ مَلِيْکٍ مُّقْتَدِرٍ) وہ اپنے رب قدیر کے پاس سچائی کے مقام پر پہونچ گئے۔
اِنَّا لِلّٰہِ وَاِنَّا اِلَیہِ راجِعُوْن
For Contact Us
Go to Contact Page
or
Mail:contact@makhdoomashraf.com
Cal:+91-9415721972